Manado, Mediamanado – Bencana alam tanggal 15 Januari lalu masih ta inga di pikiran semua warga Kota Manado, sampe ilang harta deng nyawa. Saat itu banyak orang membantu beking ringan tu beban yang kena bencana banjer. Terlebih pemerintah sangat dapa rasa depe bantuan. Mar yang jadi pertanyaan pa warga skarang, itu dana bantuan untuk sewa rumah, pemerintah ada janji tanggal 15 Desember ini, mae sampe skarang nyanda ada. So itu Ka’ Upi ada bantanya pa Om Dore deng Kindu, kalo dorang dua so dapa.
Ka’ Upi : Te’ Dore, so dapa kasana itu bantuan sewa rumah yang pemrintah ada janji pa torang ini?
Om Dore : KIapa ngana blum dapa so? Upi, Kindu lei blum dapa, sampe so brapa hari ini Kindu kurang bagate CT (cap tikus).
Ka’ Upi : Nah ini, so salah kumang kalo KIndu so gate CT.
Kindu : Kate Upi deng Dore……………… Ee, sapa nyanda mo nae darah. Itu terakhir ada dapa doi bantuan, dorang bilang, sebelum hari bae atau Natal so cair.
Ka’ Upi : Butul itu Kindu. So itu, kasana anna so bilang pa Te Fatmah, so ba beking sadiki-sadiki itu t5orang pe rumah ini.
Om Dore : E, bukang Cuma ngoni dua lei nae darah, so banya skali itu masyarakat so mulai ba marah.
Ka’ Upi : So itu lei ini, anna so binggong-bingong jaki. Sapa dang yang putar bale….?
Om Dore : E, dorang itu, nanti torang somo demo baru itu petugas dating kong kase itu torang pe hak yang pemerintah pusat ada kase bagi para korban bencana. Iyo toh…..?
Kindu : So itu kita so pusing. Sama deng itu pepatah bilang, pancuri bataria papancuri ini.
Ka’ Upi : Apa itu depe arti Kindu…………………?
Kindu : Kiita nintau lei itu. Pokoknya kita Cuma dengar noh. Terserah jo noh sapa ada baca ini, kong ta kena.
Om Dore : Nimbole bagitu komang. So pasti pemerintah somo kase torang bpe hak. Tantu katu pemerintah sementara ada ator supaya nyanda mo tasalah berbage. Iyo toh………………?
(NYOKSI)
