Di taong tujupuluan. Terkenal skali itu oto bis Mispa depe jurusan Manado Kawangkoan – Langoan. Kalo brangkat dari Karombasan jam 8 pagi sampe di Kawangkoan jam 3 deng kalo di Langoan jam 5 sore. So pasti dalam perjalanan swamua penumpang lapar. Karena setiap kampung oto Mispa ini so musti ba singgah. Om Wellem den tanta Sartje mo pulang kampung karna ada dating pa dorang pe anak di Kampus ada kuliah. Dalam perjalanan, oto Mispa ini ba brenti di Tomohon. Om Wellem kase kaluar depe kapala, kong pangge pa ini anak kacili. Anak itu pigi ba dekat pa Om Wellem. Kong Om Wellem kase kaluar doi sepuluh pera. Angko bili akang roti dua nih…! Satu for anko, kong tu satu per nyaku. Ini anak kacili dengan senang hati ambe tu doi kong mo bili akang roti for Om Wellem. Sopir Oto Mispa so kase tanda , so nyanda lama somo bajalang. Mar Om Wellem bilang, tunggu akan sadiki, nyaku da minta tolong ada bili roti. So ta lama Om Wellem ada tunggu, kong, ini anak kacili bataria pa Om Wellem. Ini anak kacili so ba kunyah-kunyah roti, kong dia bilang pa Om Wellem, napa ini doi lima pera. Kong ini anak kacili bilang, itu roti tinggal satu di warong, so itu kita Cuma bili satu, kong kita kase pulang no pa Om ini lima pera. Biar jo Om bili di Kawangkoaan, disana kua lebe banya deng murah. Ini anak kacili langsung ba putar depe badang sambil da bakunyah roti, kong kase tinggal pa Om Wellem…….!!! Om Wellem kurang badiang kong mamutung dalam hati. Awooo….! Cagampang re’en, dia lebe dulu kase kanyang, kong nyaku kurang ada talang ludah…………. Bagemana, boleh jo itu….?
EDITOR : NYOKSI
Mai Tua Ba Hugel
Dore pulang pagi dari kerja, karna ada lembur. Pe sampe dirumah, Dore dapa dengar ada suara-suara aneh dari depe kamar deng Purut. Dore langsung nae ka atas, maklum toh, Dore pe rumah panggung (rumah adat Minahasa, red) peninggalan orang tua. Pe sampe di kamar, Dore lia depe mai tua Purut ta tidor di koi nyanda pa baju, kong so basuar deng depe suara ba hosa. Dore Tanya pa Purut, kiapa ngana ini…..? Purut jawab pa Dore, kita dapa saki jantong kasiang Dore………!
Dore dapa dengar di ape mai tua bilang dapa serangan jantong, langsung turung di ruangan bawa mo ambe depe jekat, karna dia pe HP mob a telepon pa dokter. Mar depe anak ka dua yang umur 4 taong ba bilang, Papa Ade Puris ad aba sambunyi di lemari baju, kong so nyanda pake baju.
Dore kase maso ulang depe HP, kong nae ulang ka atas. Depe mai tua Purut masih da babataria. Dore pe buka itu lemarai baju. Dore lia butul skali, depe anak basudara Puris ad aba sambunyi, kong so nyanda pake baju alis batalanjang bulat dalam keadaan totofore tako, kong Dore bilang. Bukang maeng ngana Puris, Purut ada kena serangan jantong, kong ngana lari batalanjang kase tako pa anak masih kacili. Nyanda ada perasaan ngana Puris……!
EDITOR : NYOKSI
