MANADO – MediaManado.com – So dari Bulan Desember 2014 lalu ujang so turung nyanda kanal waktu. So itu di brapa tampa di seluruh Indonesia deng lebe khusus di Manado (Sulawesi Utara). Dorang bilang so depe musim, so itu musti ba jaga-jaga, jang sampe banjer ulang. Karna so ba ujang-ujang, itu got-got so nyanda dapa lia kalo tofor ato dolong. Om Dore da ba sombar karna ujang, so nyanda sabar mo pulang. Om Dore pe ba langkah kaluar tapalisi kong maso got. Kindu dapa riki lia pa Om Dore da maso got.
Kindu : Eeeeee, kiapa Dore…..! Kita kita kira Cuma orang mabo pe got itu. Ternyata got itu
deng ngana punya dang?
Om Dore : Kiapa Cuma ngana lei kita da ta maso di got dang. Angka akang dang.
Kindu : Adoh……! Kita pe kacili bagini nyanda poha mo angka pa ngana so sama deng gajah
pongoh bagitu.
Om Dore : Ta herang lei ngana Kindu, kita so bagini, ngana cuma ba diang akang. Page orang dang
kong angka akang pa kita.
Ka’ Upi : Nah ini, kalo kua Kindu yang maso got, so nyanda herang, dia amper tiap hari maso got
karna ja bagate.
Om Dore : Kita lei kua herang, so tau-tau so musim ujang, kiapa ini Pala deng Lurah nyanda mo
karja bakti.
Kindu : Eee, Dore, itu karja bakti so amper tiap hari, mar kalo ujang bagini, so pasti itu got
punuh noh. So itu musti hati-hati katu noh.
Ka” Upi : Ana lei herang, ngana sandiri pe salah, nyanda lia bae-bae itu jalang deng itu got,
Ngana beking salah pa pemerintah. Eee, pemerintah so beking itu fasilitas umum,
Seperti jalan, jembatan deng got. Mar, torang masyarakat nyanda mo urus bae-bae.
Om Dore : Butul skali itu ngoni dua da bilang. Kita pe salah katu ini noh.
Kindu : So itu kua Dore……, torang sebagai masyarakat so musti saling baku kase tau, kalo
ujang-ujang bagini, itu sampah jang buang di got, supaya nyanda mo ta prop. Noh
kalo sampe ta prop, so pasti mo banjer ulang…… iyoh toh………………..?
EDITOR : NYOKSI
